सूर्य-मंदिर बूढ़ादीत में हुयौ लूंठो साहित्य संवाद अर ई पत्रिका 'सैनाणी'रो लोकार्पण

RNE Network.

बूढा़दीत,जि.कोटा रै सूरज मंदिर परांगण मांय  थावर कै दन मायड़ भासा साहित्य संस्कृति मंच बूढा़दीत - टाकरवाड़ा अर हाडीराणी राजस्थानी भासा साहित्य संस्कृति समिति रोटेदा का भेळप मं लूंठो साहित्य संवाद उच्छब अर ई पत्रिका 'सैनाणी'रो लोकारपण हुयौ।ईं उच्छब रा सिरै पावणा साहित्य अकादमी नई दिल्ली राजस्थानी परामर्श मंडल संयोजक डा अर्जुन देव चारण सा कह्यौ -"भारत री जूनी परम्परा में पौराणिक नांव मां रै नांव पै ही हुवै, मां रो नांव अदिति हो,ईं सूं सूर्य आदित्य नांव सूं जाण्यो जावै; मां अर मायड़ भासा रो इस्थान आपणी संस्कृति में सबसूं सिरै मान्यो जावै...।"

ईं साहित्य उच्छब रा पाटवी मूर्धन्य साहित्यकार डा. नरेंद्र नाथ चतुर्वेदी कह्यौ कै आपणी बोलियां आपणी संस्कृति की जान छै। बोलियां बचैगी तो संस्कृति बी बचैगी। खास पावणा ख्यातनाम साहित्यकार सिरीमान अम्बिकादत्त कह्यौ कै राजस्थानी में समरूपता बेई बोलियां में एकरूपता की जरूरत छै। सिरी चंदालाल चकवाला ने हाड़ौती संभाग में राजस्थानी कारक्रमान की जरूरी जाणकारी दी।

उच्छब री सरूआत अतिथियां रै हातां सूं सरस्वती री तसवीर रै सांमै दीयौ जळा'र  हुयौ। सुरसत वंदना कवि विष्णु विश्वास नै करी। स्वागत भासण सिरी सी एल सांखला नै प्रस्तुत कियौ। मूर्धन्य साहित्यकार डा. क्षमा चतुर्वेदी, ख्यातनांव कवि ओम सोनी मधुर नै बी अपणा विचार परगट किया।    साहित्यकार सिरी देवकी दर्पण, लोकेश आजाद अर मुकेश गौतम संपादित ई पत्रिका 'सैनाणी' रो लोकारपण हुयौ। मुख्य संपादक सिरी देवकी दर्पण नै पत्रिका का बारा मं खास जाणकारी दी।
ईं साहित्य जलसा में मूर्धन्य साहित्यकार डा नरेंद्रनाथ चतुर्वेदी कै तांईं 'श्री आदित्य रत्न सम्मान' अर डा. क्षमा चतुर्वेदी कै तांईं 'आदित्य प्रभा सम्मान ' दियौ।  राजस्थानी भासा साहित्य सेवा सारूं सिरी चंदालाल चकवाला कै तांईं 'श्रीमती धापू बाई - श्री नैनाराम मीणा स्मृति सम्मान -पुरस्कार' दियौ, पुरस्कार सरूप इक्यावन सौ रु. नकद दिया गया।
 

मायड़ भासा राजस्थानी री सेवा सारू सिरी देवकी दर्पण,सिरी चौथमल प्रजापति,सिरी मुकेश गौतम, रामस्वरूप रावत,दिलीप सिंह हरप्रीत, दीनबंधु परालिया,लोकेश आजाद,अरविंद अंगार "मायड़ भासा सम्मान" सूं नवाज्या।

'आदर्श शिक्षक ' को सम्मान  इक्यासी वर्षीय सिरी बिरधीलाल मालव अर सिरी ओम प्रकाश मीणा कै तांईं दियौ गयौ। माध्यमिक अर उच्च माध्यमिक इस्तर को "मेधावी विद्यार्थी सम्मान" वर्षा गोचर, वंशिका गोचर, योगिता सुमन,कशिश मालव,पायल मेघवाल, अनुष्का मीणा,, विशाल सुमन.. कै तांईं दियौ।

ईं साहित्य संवाद उच्छब में साहित्यकार सिरी रघुराज सिंह कर्मयोगी,सिरी रविंद्र बीकावत, विष्णु विशाल,तेजकरण यादव,सुरेश यादव, बिरधीलाल मालव,पं. घनश्यामाचार्य गौतम, परमानंद गोस्वामी, महावीर धन्वंतरी, महावीर मयंक,महावीर प्रसाद मालव,महावीर रेनवाल,दीपेश सुमन,दीनबंधु परालिया, मेघश्याम मालव,मनोज सोनी,पुष्कर चौधरी,दुष्यंत सांखला, कार्तिक मालव,विष्णु मेघ जस्या केई मोट्यार अर मानीता रचनाकार सामल हुया। अखीर मं सह संयोजक सिरी आर सी आदित्य नै सब्याईं धन्यवाद दियौ अर आभार प्रदर्शन कियौ। कारक्रम रो संचालन डा. नंदकिशोर महावर नै कियौ।